જૂની દિલ્હીમાં મોટી દુર્ઘટના: ચાવડી બજાર મેટ્રો સ્ટેશન નજીક 3 માળની બાંધકામ હેઠળની ઈમારત ધરાશાયી, કાટમાળ નીચે અનેક લોકો દબાયા હોવાની આશંકા; રાહત-બચાવ ચાલુ
જૂની દિલ્હીના ચાવડી બજાર મેટ્રો સ્ટેશન નજીક ગુરુવારે સવારે એક ત્રણ માળની બાંધકામ હેઠળની ઈમારત ધડાકાભેર ધરાશાયી થઈ ગઈ હતી. કાટમાળ નીચે અનેક લોકો ફસાયેલા હોવાની આશંકા છે. માહિતી મળતા જ ફાયર બ્રિગેડ અને રાહત-બચાવ ટુકડીઓ સ્થળ પર પહોંચી ગઈ હતી અને અભિયાન શરૂ કરી દેવામાં આવ્યું છે.
કેવી રીતે થયો અકસ્માત?
આ અકસ્માત ચાવડી બજાર મેટ્રો સ્ટેશન નજીક આવેલી 'ગલી સિતારા'માં થયો હતો.
અધિકારીઓના જણાવ્યા અનુસાર, બનાવની માહિતી સવારે આશરે 9:50 વાગ્યે મળી હતી.
ઈમારત ધરાશાયી થતાં જ ધમાકા જેવો અવાજ આવ્યો હતો અને ધૂળની ડમરીઓ ઊડી હતી.
આ વિસ્તાર સાંકડો અને અત્યંત વ્યસ્ત બજાર હોવાથી ત્યાં દોડધામ મચી ગઈ હતી. સ્થાનિક લોકોએ તાત્કાલિક પોલીસ અને ફાયર કંટ્રોલ રૂમને જાણ કરી હતી.
ઈમારત ધરાશાયી થવાનું ચોક્કસ કારણ હજુ જાણી શકાયું નથી.
રાહત અને બચાવ કામગીરી
ફાયર બ્રિગેડની ઓછામાં ઓછી 6 ગાડીઓ સ્થળ પર મોકલવામાં આવી હતી, જેમાં વોટર ટેન્ડર અને સ્પેશિયલ રેસ્ક્યુ વાહનો સામેલ છે.
વરિષ્ઠ અધિકારીઓ સ્થળ પર હાજર છે અને કામગીરીનું નિરીક્ષણ કરી રહ્યા છે.
ટુકડીઓ સાવચેતીપૂર્વક કાટમાળ હટાવી રહી છે, જેથી ફસાયેલા લોકોને વહેલી તકે સુરક્ષિત બહાર કાઢી શકાય.
રાજકીય આરોપ: AAP ના સરકાર અને MCD પર પ્રહાર
AAP નેતા સૌરભ ભારદ્વાજે X (ટ્વિટર) પર રેખા ગુપ્તા સરકાર અને MCD પર ગંભીર આરોપો લગાવ્યા હતા.
તેમનો સવાલ છે કે જ્યારે અનેક વખત સેફ્ટી ઓડિટ કરાવવામાં આવ્યા છે, તો પછી ઈમારતો વારંવાર કેમ ધરાશાયી થઈ રહી છે?
તેમણે આરોપ લગાવ્યો કે ઓડિટના આદેશો તો આપવામાં આવે છે, પરંતુ જમીની સ્તર પર કોઈ નક્કર કાર્યવાહી થતી નથી અને અધિકારીઓ લાંચ ઉઘરાવવામાં મશગૂલ છે.
તેમનો દાવો છે કે જે લાંચ નથી આપતું, MCD માત્ર તેની દુકાન કે મિલકત સીલ કરે છે. ઉદાહરણ તરીકે તેમણે સાઉથ ઝોનના એક વોર્ડમાં GK-2 માર્કેટના બે જીમ સીલ થયાનો ઉલ્લેખ કર્યો, જ્યારે તે જ વિસ્તારમાં અન્ય જીમ અને કોમર્શિયલ ઈમારતો ધમધમી રહી છે.
