મહારાષ્ટ્ર FDA ની તહેવારી સખતાઈ: 114 ઠેકાણાઓ પરથી ₹9.01 કરોડનો ખાદ્ય સામાન જપ્ત, પતંજલિનું ₹20.20 લાખનું ગાયનું ઘી પણ જપ્ત; 19 વેપારીઓના લાયસન્સ મોકૂફ
તહેવારો દરમિયાન ભેળસેળયુક્ત અને હલકી ગુણવત્તાવાળા ખાદ્ય પદાર્થો સામે મહારાષ્ટ્રના ખાદ્ય અને ઔષધ વહીવટીતંત્ર (FDA) એ વિશેષ ઝુંબેશ ચલાવી હતી. આ અંતર્ગત રાજ્યના 114 ઠેકાણાઓ પરથી આશરે 3.53 લાખ કિલોગ્રામ ખાદ્ય સામગ્રી જપ્ત કરવામાં આવી હતી, જેની કિંમત ₹9.01 કરોડ છે. FDA કમિશનર તુકારામ મુંઢેના નેતૃત્વમાં ચાલેલી આ ઝુંબેશમાં ખાદ્ય સુરક્ષા અને સ્વચ્છતાના નિયમોના ગંભીર ઉલ્લંઘન બદલ 19 ખાદ્ય વેપારીઓના લાયસન્સ અને રજીસ્ટ્રેશન પણ મોકૂફ (સસ્પેન્ડ) કરવામાં આવ્યા હતા.
પતંજલિના ઘી પર કાર્યવાહી
ઈન્ડિયન એક્સપ્રેસના અહેવાલ મુજબ, છત્રપતિ સંભાજીનગરના સુંદરવાડી ખાતેના એક ડિસ્ટ્રિબ્યુટર પાસેથી ₹20.20 લાખની કિંમતનું 2,279.7 લીટર પતંજલિ ગાયનું ઘી જપ્ત કરવામાં આવ્યું હતું. વિભાગને પેકેજિંગ પર ખોટી માહિતી અને ઘીમાં ભેળસેળની શંકા હતી. ચાલુ વર્ષના જુલાઈ મહિનામાં પણ FDA એ 'ગેરંટીડ ઈલાજ'ના દાવાવાળી પતંજલિની ₹51 લાખની દવાઓ જપ્ત કરી હતી.
નોંધ: આ કાર્યવાહી શંકાના આધારે કરવામાં આવી છે. ભેળસેળની પુષ્ટિ લેબોરેટરી તપાસ રિપોર્ટ આવ્યા બાદ જ થશે.
શું-શું જપ્ત થયું?
ખાદ્ય તેલ, મસાલા, ચોખા, કઠોળ, ગોળ, ઘઉં અને ચણાનો લોટ, ઘી, દૂધની બનાવટો, મીઠાઈઓ, ફરસાણ, સૂકો મેવો, બેકરી પ્રોડક્ટ્સ અને નૂડલ્સ.
મંડળવાર જપ્તી
કોંકણ મંડળ: 22 પ્રતિષ્ઠાનો પરથી 1.67 લાખ કિલો સામગ્રી, કિંમત ₹5.27 કરોડ. ભિવંડીમાં એવેન્યુ સુપરમાર્ટ્સ લિમિટેડ પાસેથી વિવિધ બ્રાન્ડ્સનું 1,44,218 કિલો ખાદ્ય તેલ જપ્ત કરાયું, જે એક જ જગ્યાએથી સૌથી વધુ જપ્તી છે.
પુણે: 29 પ્રતિષ્ઠાનો પરથી 66,709 કિલો, કિંમત ₹1.47 કરોડ.
છત્રપતિ સંભાજીનગર: 22 પ્રતિષ્ઠાનો પરથી 33,679 કિલો, કિંમત ₹89.41 લાખ.
નાગપુર: 20 પ્રતિષ્ઠાનો પરથી 37,414 કિલો, કિંમત ₹53.57 લાખ.
19 વેપારીઓના લાયસન્સ મોકૂફ
ગ્રેટર મુંબઈ, અમરાવતી અને છત્રપતિ સંભાજીનગર મંડળોની મીઠાઈની દુકાનો, ફરસાણ યુનિટ્સ અને મસાલા ઉત્પાદકોના લાયસન્સ અને રજીસ્ટ્રેશન મોકૂફ કરવામાં આવ્યા છે અથવા મોકૂફીના આદેશો આપવામાં આવ્યા છે. નિરીક્ષણ દરમિયાન નીચે મુજબની ખામીઓ મળી આવી હતી:
પરિસરમાં જીવજંતુઓ અને ઉંદરોની હાજરી
ગંદકી અને ખાદ્ય પદાર્થો ખુલ્લા રાખવા
સામાનનો અયોગ્ય સંગ્રહ (સ્ટોરેજ)
પેસ્ટ કંટ્રોલના રેકોર્ડનો અભાવ
કર્મચારીઓ પાસે મેડિકલ ફિટનેસ સર્ટિફિકેટ ન હોવા
હોટેલ-ઢાબાને નોટિસ
નાસિક, છત્રપતિ સંભાજીનગર અને નાગપુર મંડળોમાં 34 હોટેલ, રેસ્ટોરન્ટ અને ઢાબાઓનું નિરીક્ષણ કરવામાં આવ્યું હતું અને સ્વચ્છતા તેમજ ખાદ્ય સુરક્ષામાં ક્ષતિઓ બદલ 29 નોટિસ જારી કરવામાં આવી હતી.
આ ઝુંબેશ ઓક્ટોબર મહિનામાં રાજ્યના તમામ સાત મંડળોમાં ચલાવવામાં આવી હતી, અને 28 થી 31 ઓક્ટોબર દરમિયાન તપાસ વધુ તીવ્ર કરવામાં આવી હતી.
