એક રાજા હંમેશા પોતાનું માથું ઢાંકીને રાખતો હતો. તેને ક્યારેય કોઈએ ખુલ્લા માથે જોયો ન હતો. ઘણા લોકોએ આ રહસ્ય જાણવાનો પ્રયત્ન કર્યો, પરંતુ રાજા દર વખતે ખૂબ જ કુશળતાથી વાત વાળી લેતો અને જવાબ આપવાથી બચી જતો. એક દિવસ તેના ખાસ વજીરે (મંત્રીએ) રાજા પાસેથી આ રહસ્ય જાણવાનું નક્કી કરી લીધું. હંમેશની જેમ રાજાએ ઘણી કોશિશ કરી કે કોઈક રીતે વજીરનું ધ્યાન ભટકાવી દેવાય, પરંતુ વજીરે પણ જાણવાનો પાકો ઈરાદો કરી રાખ્યો હતો. આખરે રાજાએ વજીર સામે હથિયાર હેઠા મૂકી દીધા (હાર માની લીધી). પરંતુ તેણે એક શરતે જ જણાવવાનું કબૂલ્યું કે તે આગળ કોઈને નહીં કહે. અને સાથે જ કહ્યું કે જો તે શરતનો ભંગ કરશે તો તેણે કડક સજા ભોગવવી પડશે. રાજાએ જણાવ્યું કે તેના માથા પર એક શીંગડું છે, એટલા માટે તે પોતાનું માથું હંમેશા ઢાંકીને રાખે છે...! આ વાતને હજી થોડા જ દિવસો થયા હતા કે આખા શહેરમાં એ સમાચાર ફેલાઈ ગયા કે રાજાના માથા પર શીંગડું છે. રાજાને ખૂબ ગુસ્સો આવ્યો. તેણે તેના ખાસ વજીરને બોલાવ્યો અને શરતનો ભંગ કરવા બદલ શાહી હુકમ કર્યો કે તેને સખતમાં સખત સજા આપવામાં આવે. વજીર ખૂબ જ બુદ્ધિશાળી હતો, તે તરત જ બોલ્યો: "મહારાજ! જ્યારે તમે રાજા હોવા છતાં પોતે જ પોતાનું રહસ્ય ન છુપાવી શક્યા, તો પછી તમે મારી પાસે કે અન્ય કોઈ પાસે કેવી રીતે એવી આશા રાખી શકો કે તે તમારા રહસ્યને છુપાવીને રાખે? તેથી જેટલી સજાનો હકદાર હું છું, એટલી જ સજા તમને પણ મળવી જોઈએ." બોધ: જીભમાંથી નીકળેલા શબ્દો અને કમાનમાંથી છૂટેલું તીર જ્યારે નીકળે છે ત્યારે બે વસ્તુઓ થાય છે: પહેલી એ કે તે ક્યારેય પાછા ફરી શકતા નથી, પછી ભલે તમે ગમે તેટલો પસ્તાવો કરો. અને બીજી એ કે તે પછી જ્યાં જ્યાંથી પસાર થાય છે, ત્યાં પોતાની તીવ્રતા અને શક્તિ અનુસાર ઘા (ઝખમ) આપતા જાય છે, જેનો દોષ આપણે આપણા સિવાય બીજા કોઈને ન આપી શકીએ. એટલા માટે જ કહેવાય છે કે જ્યાં સુધી શબ્દો તમારા અંદર રહે છે, ત્યાં સુધી તે તમારા ગુલામ હોય છે. અને જેવા તે બોલાઈ જાય છે, પછી તમે તેના ગુલામ બની જાઓ છો. આગામી આખી જિંદગી તમારે તમારા કર્મ અને ચરિત્રથી તમારા કહેલા શબ્દોનું પાલન કરવું પડે છે. ___________📝📝📝___________ સાભાર (મનકૂલ) પસંદગી: ઇસ્લામિક ટ્યુબ પ્રો એપ