اندور میں ای وی شوروم کے اندر ہولناک آگ؛ تمام الیکٹرک گاڑیاں جل کر خاکستر
اندور: الیکٹرک گاڑیوں کے شوروم میں ہولناک آگ، پڑوسیوں نے لکڑی کی سیڑھی کا پل بنا کر پھنسے ہوئے لوگوں کو بچایا اندور: مدھیہ پردیش کے شہر اندور کے مشرقی علاقے میں واقع ایک الیکٹرک گاڑیوں (EV) کے شوروم میں اچانک زبردست آگ بھڑک اٹھی، جس کے نتیجے میں شوروم میں موجود تمام گاڑیاں جل کر خاکستر ہو گئیں۔ آگ کی شدت کے باعث عمارت کی بالائی منزل پر رہنے والے مکین اوپر ہی پھنس گئے اور پوری عمارت دھوئیں کی لپیٹ میں آ گئی۔ اس نازک صورتحال میں آس پاس کے مقامی لوگوں نے کمالِ بہادری کا مظاہرہ کیا۔ پڑوسیوں نے ایک لکڑی کی سیڑھی کو جلتی ہوئی عمارت کی چھت اور ملحقہ مکان کی چھت کے درمیان رکھ کر ایک عارضی پل بنا دیا۔ اس منفرد اور دیسی طریقے کی مدد سے بالائی منزل پر موجود تمام مکینوں کو ایک ایک کر کے بحفاظت دوسری چھت پر منتقل کر لیا گیا۔ واقعے کی اطلاع ملتے ہی فائر بریگیڈ کی ٹیم نے مقامی لوگوں کی مدد سے آگ پر قابو پایا۔
